Published On:Monday, September 22, 2014

Posted by Tekman Shakya

इन्चोन, ६ असोज । दक्षिण कोरियाको इन्चोनमा जारी १७औं एसियाली खेलकुद प्रतियोगिता अन्तर्गत आफ्नो दोस्रो खेलमा जीत दर्ता गर्दै नेपाली महिला क्रिकेट टीम क्वाटरफाइनलमा स्थान बनाउन सफल भएको छ ।

सोमबार बिहान भएको खेलमा नेपालले चीरपरिचित प्रतिद्वन्द्वी मलेसियालाई ४६ रनले पराजित गरेसँगै समूह डी को उपविजेताको रुपमा अन्तिम आठमा स्थान सुरक्षित गरेको हो ।
क्वाटरफाइनलमा नेपालले बुधबार बंगलादेशको सामना गर्नेछ ।
नेपालले प्रस्तुत गरेको ८९ रनको लक्ष्य पछ्याएको मलेसिया १४ ओभर ५ बलमा ४२ रन जोड्दा अलआउट भयो । मलेसियालाई सस्तैमा समेट्ने क्रममा करुणा भण्डारीले ४ तथा सरिता मगर, रुविना क्षेत्री र सोनु खड्काले १-१ विकेट लिए । मलेसियाका लागि विकेट किपर ब्याट्सम्यान क्रिस्टिना ब्रेटले ११ रन जोड्नु बाहेक अन्य कसैले दोहोरो अंकमा रन जोड्न सकेनन् ।

यसअघि टस हारेर पहिले ब्याटिङ को निम्तो पाएको नेपालले निर्धारित २० ओभरमा ३ विकेट गुमाएर ८८ रन जोडेको थियो । नेपालको पारीमा ममता चौधरीले सर्वाधिक २२, सीता राना मगरले १८, सरिता मगरले १२, सोभा आलेले ६ तथा नेरी थापाले ४ रन जेडेका थिए । यसअघि पहिलो खेलमा नेपाल थाइल्याण्डसँग पराजित भएको थियो ।